O vindeiro 17 de outubro a Cidade da Cultura acolle Cooperación Galega: unha carreira de fondo, un gran encontro co que celebrar e saber máis das máis de tres décadas de traballo da cooperación ao desenvolvemento dende Galicia a favor dos dereitos das persoas máis vulnerables en todo o mundo.
Un percorrido con osbtáculos, pero no que diferentes sectores foron sumando a súa vontade e a súa experiencia para facer da cooperación internacional un instrumento de xustiza social na que todas as persoas temos cabida.
A cooperación galega da man das súas protagonistas
Este proceso de longo percorrido exemplificarase a través de persoas -chegadas dende diferentes países do Sur Global- que falarán en primeira persoa dos logros da Cooperación Galega e do impacto que esta tivo nas súas vidas e no fortalecemento e dereitos das súas comunidades.
A xornada -que contará coa participación do conselleiro de Presidencia, Xustiza e Deportes, Diego Calvo, xunto con outros responsables políticos- reunirá no Edificio CINC do Gaiás a persoas vinculadas á cooperación galega dende diferentes países e proxectos.
Nunha primeira mesa, coñeceremos procesos de transformación contados por socias locais:
- Lizete Dias, xefa de Recursos Hídricos da Administración Rexional de Augas do Sur de Mozambique, entidade socia de Augas de Galicia.
- Pamela Violeta Sánchez Pereira, antropóloga, coordinadora da Unidade de Educación da Fundación IRFA de Bolivia, entidade socia de Entreculturas e Taller de Solidariedade.
- Juan Castillo, director da Fundación Solidaridad de República Dominicana, entidade socia da Fundación Balms.
- Roger Armando Reyes, director executivo de CODDEFAGOLF, de Honduras, entidade socia de Enxeñería Sen Fronteiras.
E nuha segunda palestra poderemos coñecer en profundidade o labor e o testemuño de tres defensoras de dereitos, acollidas na segunda edición de Galicia Abriga:
- Ana Donis, avogada de Mujeres Transformando el Mundo (Guatemala)
- Milagro Alvarado, fundadora de Colectiva Feminista (El Salvador)
- Juventina López, lideresa comunitaria de ASIAPRODI (Guatemala)
Experiencias de cooperación dende diversas perspectivas
Tamén falarán representantes de diversos colectivos, que compartirán as súas experiencias coñecendo en primeira persoa proxectos de cooperación galega:
- Bruno Ramos Sánchez, gañador do premio de Educación para a Cidadanía Global 2024
- Sandra Lorenzo Casado, alumna en Prácticas de Coñecemento da Realidade de Enxeñería Sen Fronteiras.
- Alia del Río Riobó, enfermeira e matrona voluntaria de Solidariedade Internacional de Galicia, Sólida e Solidariedade Galega.
- Javier Ramos Cernada, xornalista voluntario de Agareso
A primeira parte da xornada completarase coa proxección dun vídeo sobre procesos de cooperación en Educación, en Mozambique; en Medio Ambiente, en Honduras; en Habitabilidade, en Guatemala; en Pesca e Acuicultura, en El Salvador; e en Feminismos, na República Dominicana.
Tempo de reflexión e debate
A xornada complétase con tres espazos de reflexión e debate sobre tres cuestións moi presentes no traballo que desenvolve a cooperación galega nos 23 países nos que ten presenza:
- Conflito, axuda humanitaria e refuxio. Espazo dinamizado por Médicos do Mundo
- Vulneración de Dereitos Humanos e peche dos espazos cívicos. Espazo dinamizado por Asemblea de Cooperación pola Paz
- Feminismos e traballo en rede. Espazo dinamizado por InteRed
Ademais, nas salas e espazos comúns deste gran encontro arredor da cooperación haberá exposicións de varioas organizacións socias da Coordinadora.
