Como parte da plataforma Futuro en Común, integrada por máis de 50 organizacións da sociedade civil, presentámosvos “El INconFORME”, unha folla de ruta integral e consensuada de aquí a 2030 para dar solución aos desafíos que presentan a emerxencia climática, as desigualdades, a crise democrática ou a nosa pegada no mundo.
O documento reúne as loitas compartidas e propostas para o cambio acordadas entre máis de 50 plataformas e organizacións da sociedade civil de diferentes sectores: medioambiente, feminismos, infancia, migracións, paz, acción social, acción sindical, cooperación e xustiza global; nun exercicio de reflexión, diálogo e entendemento.
O progreso non pode continuar sendo á conta dos dereitos humanos, nin superando os límites ambientais. Debemos abordar cada un dos desafíos, tendo en conta os demais.
O INconFORME analiza as crises solapadas e entrelazadas que enfrontamos (ambiental, social, económica e democrática), propoñendo medidas urxentes para acelerar o cambio de modelo. As demandas recollidas no informe buscan avanzar cara a unha economía do benestar ao servizo das persoas e o planeta, erradicando as desigualdades e favorecendo unha maior e mellor democracia, co fin de deixar unha mellor pegada no mundo.
