O pasado 15 de xuño, o I Encontro da Sociedade Civil Galega – Tecendo Futuro marcou un fito reunindo no Museo do Pobo Galego a máis de trinta entidades de ámbitos moi diferentes dispostas a traballar xuntas por un futuro máis xusto e sostible para o noso territorio. O encontro concluíu cunha forte determinación de seguir colaborando nunha estratexia común e fortalecendo os lazos entre as organizacións participantes.

Durante a sesión, avanzouse nas conclusións extraídas das mesas online celebradas en maio, que xa xeraran unha serie de propostas. Ademais das ideas recollidas previamente, xurdiron novas iniciativas de colaboración para desenvolver nos próximos meses. Os temas prioritarios foron a formación, a comunicación, o feminismo -con especial atención ao sistema de coidados- e a educación.

Un dos acordos principais foi a creación dun manifesto consensuado e aberto á inclusión de novas entidades que permita a sociedade civil galega posicionarse como un axente de cambio na transición cara a un mundo máis equitativo e respectuoso co planeta, así como a realización de incidencia política conxunta.

Para dar soporte a estas actividades e seguir artellando a rede de traballo acordouse a creación dun grupo motor, grupos de traballo territoriais ou temáticos e a realización dun segundo encontro no que poder avanzar máis nas propostas.

Grazas a todas as organizacións participantes, sen vós isto non sería posible!!

Neste enlace podes consultar a síntese das conclusións das mesas de traballo.