Santiago, 24 de febreiro. Hoxe cúmprese un ano do inicio da invasión de Rusia á Ucraína, e o agravamento da situación está xerando graves vulneracións dos dereitos humanos. Segundo Nacións Unidas, máis de 18 millóns de persoas precisan axuda humanitaria no país e en toda Europa. Preocupa, especialmente, a vulneración de dereitos das mulleres pola violencia sexual exercida polas forzas ocupantes e o aumento da violencia de xénero; tamén o impacto do conflito sobre a infancia e a terceira idade. Dende a Coordinadora reivindicamos o labor das nosas organizacións en terreo e recordamos que o apoio da cidadanía segue a ser fundamental.
Este ano de guerra suma máis de 7 millóns de persoas refuxiadas, case 7 millóns de desprazadas internas, destrución masiva de infraestruturas, desabastecemento e violacións de dereitos. Precísanse maiores esforzos internacionais para xerar condicións de diálogo e negociación que constrúan o escenario necesario para o fin da guerra. A paz é urxente. Débese iniciar un proceso de desmilitarización e desnuclearización das relacións internacionais, mais tamén das nosas políticas, dos presupostos e dos discursos. É imprescindible reducir os gastos militares e promover políticas de desarme e resolución de conflitos. España é o quinto país exportador de armas do mundo. Os recursos destinados a esta industria son fondos que deixan de destinarse a promover o desenvolvemento social e económico, a cooperación, a cultura de paz e a transición ecolóxica.
Recentemente tivemos a oportunidade de escoitar as reflexións das organizacións galardoadas co premio Nobel da Paz 2022; colectivos sociais que traballan dende Rusia, Ucraína e Bielorrusia. Persoas que, a pesar de sufrir directamente as consecuencias da guerra, ou precisamento por isto, defenden o diálogo e a paz. Moitas organización, entre elas a Coordinadora, asinamos una carta dirixida ao presidente Pedro Sánchez co obxectivo de promover a axenda de paz. Esiximos, sumándonos ás reivindicación dos colectivos mencionados:
- Garantir apoio político, técnico e financeiro para facer fronte á impunidade de quen comete crímenes de guerra e contra a humanidade. Queremos que se apoie a creación dun tribunal especial contra a agresión rusa.
- Contribuír ao programa de apoio a persoas defensoras de dereitos humanos de Ucraína, Rusia e Bielorrusia. Isto implica facilitar os procesos de tramitación de visados, os sistemas de evacuación e acollida, e a organización de visitas de intercambio de experiencias. Estas medidas reducirían o impacto traumático da guerra e outros tipos de violencias.
- Ofrecer apoio institucional ás iniciativas pola liberación de prisioneiros políticos da rexión. Esta medida inclúe o apoio ás súas familias, mediante campañas de acompañamento e outras estratexias de presión e soporte político.
- Apoiar de forma activa aos actores que promoven iniciativas de resistencia non violenta nas zonas ocupadas.
- Incrementar o apoio ás comunidades refuxiadas, ás exiliadas e exiliados políticos para
facilitar a obtención do asilo, mellorar a súa acollida e integración sociolaboral. Esta medida debe extenderse a tódalas persoas afectadas polos conflitos armados e outras violencias.
Un día coma hoxe é preciso recordar tamén as nosas recomendacións sobre como apoiar á
poboación na Ucraína e ás ONGD que continúan traballando en terreo:
