A terceira edición do Premio Galego de Educación para o Desenvolvemento e Cidadanía Global xa ten galardoados!
Trátase dos proxectos Sentindo en feminino, do CEIP López Ferreiro, de Santiago de Compostela (categoría A), Re_Étika: pensa, consume, actúa. I Feira da sostibilidade, do IES Luís Seoane, de Pontevedra (categoría B) e Cartografía corporal: dos discursos de odio a un lecer compartido, da facultade de Ciencias da Educación da Universidade da Coruña (categoría C).
Un Premio Galego de Educación con numerosas candidaturas
Non foi unha decisión sinxela para o xurado. En primeiro lugar pola cantidade de propostas a valorar: un total de 23 candidaturas, repartidas entre as tres categorías establecidas. Pero tamén -e así o indica o xurado na súa resolución- pola gran calidade de todas elas .
Por iso tamén quere recoñecer expresamente o traballo e esforzo de profesorado, alumnado e comunicade educativa implicada nos 23 proxectos presentados, e por suposto agradecer a súa participación. Un agradecemento ao que tamén se suma a Coordinadora Galega de ONGD.
O xurado desta terceira edición do Premio estivo formado por Lorena Rilo (técnica da Oficina de Cooperación e Voluntariado da Universidade da Coruña e Presidenta da Plataforma Coruñesa de Voluntariado), Carolina Diz (técnica de cooperación da Dirección Xeral de Relacións Exteriores e coa UE da Xunta de Galicia e xerente da Fundación Axencia Humanitaria de Galicia), Ovidio Villar (Profesor de matemáticas no IES Carlos Casares (Viana do Bolo) e gañador do II Premio Galego de ECG na categoría B), Sara García (técnica da Coordinadora Galega de ONGD), Flor Barán (Coordinadora de comunicacións e procesos para novos liderados coa infancia e a xuventude na organización Mujeres Mayas Kaqla en Guatemala) e Francisco Javier Agrafojo (Coordinador do Servizo de Participación e Inclusión Universitaria da Universidade de Santiago de Compostela e membro do Consello Galego de Cooperación para o Desenvolvemento).
Os galardóns desta terceira edición do Premio entregaranse no mes de xuño, nun acto que se celebrará en Compostela.
Como vén sendo habitual, o alumnado e profesorado implicado nos proxectos gañadores recibirán nesta gala un diploma, así como un elemento distintivo para cadanseu centro. Ademais, como novidade, este ano as docentes premiadas (dous por cada proposta) terán a posibilidade de visitar un proxecto de cooperación internacional en Guatemala.
