Aproveitando a convocatoria das eleccións galegas queremos compartir as propostas que nestes días lle trasladamos ás forzas políticas que aspiran a presidir a Xunta de Galicia.
Somos conscientes de que, para elas, este é o momento da escoita, da implicación e do compromiso con diferentes sectores da nosa sociedade. Por iso, non queremos deixar pasar a ocasión de compartir cos candidatos e candidatas o que entendemos que son os cinco puntos principais para o futuro da cooperación galega.
Por que facemos estas cinco propostas nas eleccións galegas?
Dende a Xunta de Galicia impúlsase -igual que dende outras autonomías e dende o propio Estado- unha política pública de cooperación ao desenvolvemento, que conta cun Plan Director refrendado no Parlamento de Galicia.
Existe, por tanto, un consenso arredor desta política e o que pedimos as organizacións de cooperación ao desenvolvemento é un compromiso aínda maior e eficaz. Que estea á altura do que pide o contexto global ao que nin Galicia nin ningún país é alleo.
Máis alá da solidariedade e do concepto de xustiza global, a realidade demostra que conflitos locais, a miles de quilómetros, acaban por impactar na nosa realidade. O único modo de que todas as persoas teñamos garantidos os nosos dereitos é que iso sexa así en todos os lugares do mundo.
Algo que está moi lonxe de ocurrir en moitos países, no que a falta de dereitos básicos (saúde, reprodutivos, educación, alimentación, vivenda,…) convive coa persecución dos dereitos fundamentais (identidade sexual, xénero, liberdade de expresión e política,…) e das persoas que os defenden, que a miúdo corren riscos que comprometen a súa vida.
Cinco propostas para o futuro da cooperación
A nosa intención é, nestas semanas de pre-campaña e campaña electoral, trasladarlle a cada candidatura a importancia de reforzar o compromiso actual coa política pública de cooperación ao desenvolvemento autonómica.
Xa o fixemos co equipo redactor do programa electoral do Partido Popular, coordinado por Valentín García, e coa candidatura do PSdeG pola provincia da Coruña que encabeza Patricia Iglesias. Á xuntanza coa Coordinadora asistiron tamén Silvia Longueira e Julio Abalde.
Tamén coa candidatura do BNG na Coruña, nunha xuntanza na que estiveron Mercedes Queixas, Iria Taibo, Beatriz Mérez Mosquera e Francisco Jorquera. Este encontro completouse días despois cunha xuntanza con Luis Bará, cabeza de lista do Bloque por Pontevedra.
A rolda de xuntanzas pechouse cun encontro en Lugo coa cabeza de lista do Partido Popular nesta provincia, Elena Candía, e unha xuntanza con Jesús Gamallo, director xeral de Relacións Exteriores e coa Unión Europea, e Pilar Romero, subdirectora xeral de Cooperación Exterior da Xunta de Galicia.
Facémolo en base a cinco propostas para o futuro da cooperación galega que entendemos que responden á realidade actual global e aos seus retos. Dende unha perspectiva baseada nas relacións horizontais e de aprendizaxe mutua entre as organizacións galegas e as do Sur Global, o feminismo e a sostibilidade.
Unha cooperación de vangarda que responda a un contexto global no que nunca foi tan importante o compromiso local e no que nunca foi tan importante cooperar.
