Sudán afronta neste momento a maior crise humanitaria e de desprazamento do mundo. Unha afirmación dramática de por si, pero que acada toda a súa dimensión se temos en conta, precisamente, como está o mundo. Con situacións tan graves contra os dereitos humanos como a de Palestina, pero tamén a de República Democrática do Congo, Ucraína ou a de ducias de conflitos activos que nin sequera forman parte do noso día a día informativo.
Que significa a crise de Sudán?
Agora mesmo en Sudán máis de 24 millóns de persoas non teñen alimentos suficientes para a súa subsistencia. Máis de 12 millóns tiveron que fuxir nos últimos dous anos dos seus fogares, converténdose en protagonistas dun dos maiores desprazamentos forzosos do planeta. En 5 zonas do país hai actualmente fame sistémica e considérase que 17 zonas máis do país en situación moi vulnerable poderían seguir ese mesmo camiño.
Neste momento, a ONU calcula que 30 millóns de persoas -a metade delas menores- precisan axuda urxente. Detrás destas dramáticas cifras está a guerra que dende o 15 de abril de 2023 arrasa o país.
Asalto ao campo de Zamzam
Zamzam, con case 750.0000 persoas acolidas, é un dos campos de desprazadas máis grandes de Sudán e vén de ser víctima dun ataque que engade máis sufrimento a unha poboación castigada pola fame, a violencia e a falta absoluta de recursos.
Este último asalto deixa unha cifra de alomenos 300 persoas mortas e un gran número persoas que fuxiron poñendo en risco a súa propia supervivencia, ademais de numerosos testemuños documentados de asedios, saqueos e asasinatos.
Esta situación non é nova. O pasado mes de febreiro Médicos sen Fronteiras tivo que tomar a decisión de marchar do campo pola escalada de violencia e os graves problemas de seguridade. Dende aquela, a organización perdeu o contacto cos seus colaboradores locais. Neste último ataque, nove compañeiros médicos de Relief International, a única organización humanitaria internacional que seguiu operando en Zamzam, foron asasinados.
A vulnerabilidade da infancia
A ONU alerta de que neste contexto de extrema inseguridade e necesidades a cantidade de nenos e nenas que precisan asistencia humanitaria en Sudán rebasa xa os 15 millóns, duplicando as cifras rexistradas en 2023, no comezo da guerra.
A violencia en ascenso, a fame e as restriccións de acceso e financiamento da axuda poden convertir esta situación nunha catástrofe aínda maior, segundo alerta o Fondo da ONU para a Infancia. Dos 1.000 millóns de dólares necesarios para afrontar este ano, UNICEF apenas recibiu 12.
Case a metade das persoas desprazadas son nenos e nenas. Neste dous últimos anos, as violacións graves contra a infancia aumentaron un 1000%, incluíndo asasinatos, mutilacións, secuestros e ataques a escolas e hospitais.
Catherine Rusell, directora executiva de UNICEF, é clara: “Sudán é a maior crise humanitaria hoxe en día, pero o mundo non lle está prestando atención”.
