O mes de outubro comezou para nós en Xixón, onde se celebrou o XIX Encontro da Rede de Coordinadoras Autonómicas de ONG para o Desenvolvemento.
Organizada nesta ocasión pola Coordinadora de ONGD do Principado de Asturies, a xuntanza permitiunos tecer rede coas compañeiras doutros territorios, participar en charlas e obradoiros e traballar en liñas extratéxicas e nesta resolución final que compartimos.
RESOLUCIÓN DA REDE DE COORDINADORAS AUTONÓMICAS DE ONGD
2024 está a ser sen dúbida un ano convulso, un ano que a nivel internacional viu copadas as portadas dos medios pola guerra e as violencias, e polas máis de 70 eleccións que se celebraron en diferentes lugares do planeta. Quizáis esa perspectiva poida ser unha boa definición de todo o que nos acontece, a nivel global e local, pois semella que a paz e os valores democráticos precisan máis ca nunca ser refrendados por unha cidadanía comprometida, mobilizada e crítica.
Cumpriuse un ano da última escalada de violencia de Israel en Palestina, que fixo e fai tremer ao mundo e á que a cidadanía respondeu con mobilizacións cunhas demandas claras: a paz como único camiño e a imperiosa necesidade de que o Dereito Internacional Humanitario, o dereito internacional dos dereitos humanos e o traballo das organizacións da sociedade civil sexa respectado, sen excepción.
