Desde a Coordinadora Galega de ONG para o Desenvolvemento queremos impulsar un encontro para imaxinar xuntas o futuro que queremos e co que soñamos. O encontro nace e inspírase na plataforma Futuro en Común, da que a Coordinadora forma parte, unha alianza formada por máis de 50 organizacións e plataformas do estado español que se uniron para acabar coas causas da pobreza, a desigualdade e a destrución do medio ambiente.

Non temos dúbidas de que se nos unimos seremos máis fortes e, entre todas, poderemos traballar para construír unha sociedade máis xusta e igualitaria, onde as persoas e o planeta estean no centro. Tamén para apoiarnos e darnos azos. Coñecernos, compartir, tecer futuro.

Queremos que o encontro sirva para construír un documento base coas nosas principais reivindicacións pero tamén un lugar para festexar e celebrar que somos tantas e tan diversas. Ese documento servirá como ferramenta para aumentar a nosa incidencia social e política, para trazar unha folla de ruta común ou para esixir ao goberno e administracións coherencia no desenvolvemento das políticas públicas.

Para levar a cabo este proceso tan ambicioso e ilusionante nun contexto xeralizado de présas e falta de tempo que a todas nos ten atravesadas, propoñemos unha axenda de traballo moi acoutada e práctica. Cada entidade participante é convocada a dúas xuntanzas online (mesas) nas que nos iremos poñendo cara e avanzaremos o traballo e un encontro presencial no mes de xuño para pór tamén os corpos. É dicir, dúas reunións online e un encontro presencial, só iso!

As xuntanzas online divídense en tres mesas de traballo paralelas, de modo que cada organización participe unicamente nunha delas. Por suposto, se tedes interese e ánimo, sodes benvidas en todas:

MESA 1: Unha economía ao servizo das persoas e o planeta, na que se abordarán cuestións como: novos modelos de desenvolvemento / equilibrio territorial e medio rural / economías transformadoras / produción sostible de enerxía / soberanía alimentaria / produción agrícola, pesqueira e monte sostible /  mobilidade e transporte limpo / emprego decente e unha economía responsable con terceiros países…

MESA 2: Unha casa para todas na que se abordarán cuestións como: saúde / vivenda / coidados / políticas sociais / inclusión / feminismo / dereitos LGTBIQ+ / migracións e refuxio / infancia / rendas mínimas / ingreso mínimo vital  / sistema fiscal xusto…

MESA 3 Unha democracia vizosa,na que se abordarán cuestións como: medios de comunicación plurais e horizontais / soberanía dixital / educación para a transformación social / dereitos sociais / transparencia e participación da sociedade civil / cultura democrática…

No encontro presencial, previsto para o 15 de xuño, reunirémonos todas as persoas e entidades participantes para compartir o traballado e avanzar nunha proposta común.

Por motivos de organización, agradecemos que as inscricións sexa, na medida do posible, ata unha semana antes da primeira xuntanza.

Estamos desexando encontrarnos!