Somos Ponte celebrou entre os meses de novembro e decembro a súa segunda edición. Tras unha primeira experiencia o ano pasado, orientada a explicar que é a cooperación ao desenvolvemento, neste 2024 o programa -que a Coordinadora desenvolve en colaboración coa Deputación de Pontevedra- quixo evidenciar que é o que une a cooperación no Sur Global co traballo cotián de organizacións, colectivos e entidades da provincia.
Para iso, desenvolveu a xornada “Soñalo en grande, facelo posible”, obradoiros en centros de ensino da provincia e o xogo dixital “Ponte ao día!”.
Dereitos que non deixan a ninguén atrás
A xornada “Soñalo en grande, facelo posible” (14/11/24) reuniu a medio cento de persoas no Salón de Plenos da Deputación de Pontevedra arredor do dereito a unha educación inclusiva.
Partiu da proxección do documental “Soñarlo en grande”, que recolle unha experiencia innovadora neste ámbito na comunidade de Champerico (Guatemala) na que participaron as organizacións de cooperación galegas Proyde e Arquitectura sen Fronteiras e completouse, entre outras propostas, cunha conversa aberta.
Esta charla contou coa participación de Érica García, orientadora do CEIP do Foxo (A Estrada), Paula Tilve, responsable da Área de Educación e Públicos do Museo Provincial de Pontevedra, Lolo Seoane, responsable do Programa Educación-Fademga e Paula Verde, impulsora do proxecto “Mi mirada te hace grande” e activista da plataforma “Quererla es crearla” a prol dunha educación inclusiva.
A actividade, pensada como un punto de encontro entre organizacións de cooperación e outras organizacións sociais da provincia, baseouse neste dereito como fío co que tecer rede entre persoas e entidades.
Porque se ben a loita pola inclusión non é un foco de acción específico da cooperación -como si o é de boa parte das organizacións e persoas asistentes- si que é un eixo transversal da súa acción, xa que a loita polos dereitos ou é con todas as persoas ou non é. E ningunha mellora é tal se deixa a alguén atrás.
Trala celebración desta xornada elaborouse unha guía para as asistentes que tamén podes consultar aquí. Nela atoparás acceso ao documental “Soñarlo en grande”, así como ao testemuño de Damián Vail, un dos seus protagonistas, e contidos para ampliar a información abordada na conversa facilitados por algunhas das persoas que participaron nela.
O documento recolle tamén necesidades e posibilidades sobre inclusión -e máis concretamente sobre educación inclusiva- aportadas por algunhas das organizacións da provincia de Pontevedra que asistiron ao encontro.
Somos Ponte, tamén nas aulas
E que ten que ver isto cun centro educativo? As formacións en agroecoloxía e o apoio para a comercialización e venda dos produtos cultivados xeran alá unha economía circular, de proximidade e sostible. Que permite o emprendemento das mulleres e que inflúe tamén na soberanía alimentaria e na alimentación da súa comunidade.
Entender aquí que comemos, tratar de que sexan produtos de proximidade e cociñalos dun xeito respectuoso, evitando o desperdicio de alimentos e alimentándonos ben, pecha ese círculo .
Ademais, tamén dentro do marco de Somos Ponte o CIP Domingo Fontán de Portas acolleu varias sesións dun obradoiro facilitado por Solidariedade Internacional de Galicia: unha gymkana educativa directamente relacionada cun proxecto que a ONGD está a desenvolver en O Salvador e que conta con financiamento da Deputación de Pontevedra.
Estes talleres -que serviron como estrea do xogo dixital “Ponte ao Día!”- permitiron abordar dende o xogo e e reflexión en equipo que é a cooperación ao desenvolvemento, como participa nela a cidadanía e por que é importante que administracións locais, como a Deputación, se impliquen nela.
Ponte ao día: aprender botando unha partida
Somos Ponte 2024 complétase cunha proposta dixital: o xogo “Ponte ao Día!”, que botou a andar precisamente coa rapazada de Portas, que foi quen -tralos obradoiros. estreou esta proposta dixital, cun notable éxito nas respostas!
Este xogo de preguntas e respostas ofrece dúas modalidades -individual e colectiva- e dous niveis de dificultade. O obxectivo: comprobar canto se sabe (e saber máis!) sobre cooperación, solidariedade e o Sur Global.
En definitiva, trátase de levar Somos Ponte ao dispositivo electrónico da cidadanía, facilitando un primeiro contacto con diversas cuestións: dende que significan as siglas ONGD, cantos idiomas se falan en Guatemala, onde está o tren máis longo do mundo ou que é a cooperación descentralizada.
O xogo permitirá tamén achegarse aos proxectos de cooperación ao desenvolvemento apoiados dende a Deputación de Pontevedra na súa última convocatoria.
Ademais de pasalo ben aprendendo, as persoas que completaron a partida durante os primeiros dez días de vida do xogo atoparon a posibilidade de rexistrarse para participar nun sorteo, que se celebrou o luns 16 de decembro e cuxa gañadora -de entre máis de medio cento de xogarores inscritos das case 200 partidas rexistradas nesa data- resultou ser Judith, veciña de Vigo.
O premio consistiu nunha cesta de produtos variados de comercio xusto e de agasallos elaborados polos usuarios e usuarias das asociacións Lenda e Alba, ambas da provincia de Pontevedra.
Así, Somos Ponte vincula tamén o local e o global ofrecendo unha alternativa de agasallo socialmente xusta e sostible para todas.
Pontevedra tece redes co Sur Global
Somos Ponte puxo o foco no traballo que a cooperación fai alén da provincia a través da conversa arredor da inclusión, na xornada “Soñalo en grande, facelo posible”, no deseño e contido dos obradoiros escolares e nas preguntas do trivial “Ponte ao Día!”.
Recollémolo tamén aquí: estes son os proxectos e organizacións que contaron co apoio da Deputación de Pontevedra -a través da súa convocatoria para proxectos de cooperación internacional- neste 2024.
