É necesario que as administracións públicas, e neste caso os Concellos e Deputacións, reforcen o seu apoio á política pública de cooperación ao desenvolvemento, hoxe máis necesaria ca nunca.
Por este motivo, representantes da CGONGD reunímonos nas últimas semanas con representantes políticos dos distintos partidos candidatos as eleccións locais en cidades como Santiago de Compostela, Vigo, Lugo e Pontevedra e con parlamentarios/as e responsables de política municipal dos partidos. O obxectivo destes encontros foi presentar as nosas propostas en materia de cooperación ao desenvolvemento.
A política de cooperación segue sendo unha das que máis consenso suscita ao seu arredor, incluso nun momento de máxima polarización política. Este consenso nace do apoio social. A cidadanía española segue á cabeza dos países europeos en canto a solidariedade e apoio á cooperación ao desenvolvemento tal e como o amosan os datos do Eurobarómetro. Só as ONGD socias da Coordinadora sumamos máis de 25.000 galegos e galegas nas nosas bases sociais, persoas que coa súa labor solidaria e o seu apoio económico fan que poidamos desenvolver o noso traballo.
Non obstante, este apoio social precisa ser reforzado tamén dende os Concellos e Deputacións. Cómpre apoiar ás máis de 339 millóns de persoas que, segundo as últimas cifras de Nacións Unidas, precisarán de axuda urxente en países como Afganistán, Siria, Iemen, Etiopía, República Democrática do Congo, Sáhara ou Somalia. Tamén estar onde non hai emerxencias humanitarias pero os problemas estruturais como a fame e malnutrición, a crise climática e/ou os desprazamentos forzados persisten.
A estas problemáticas súmanse tamén o aumento dos discursos de odio cara as persoas máis vulnerables e o ritmo crecente do autoritarismo e a persecución a activistas e ONG defensoras de dereitos humanos, que está a ser particularmente grave nos países nos que traballamos dende Galicia.
Estas son as nosas propostas para Concellos e Deputacións solidarias e comprometidas
1. COMPROMISO POLÍTICO E ORZAMENTO DIGNO
Queremos unha política de cooperación ao desenvolvemento transformadora isto é: feminista, ecoloxista e que defenda os dereitos humanos. Isto implica asegurar dotacións orzamentarias suficientes: deberamos chegar de forma paulatina ao 0,4 % do orzamento consolidado ao final do novo ciclo político (e sempre co horizonte de acadar o compromiso internacional do 0,7 %).
2. AXUDAS PÚBLICAS TRANSPARENTES E EN CONCORRENCIA COMPETITIVA
Queremos que os fondos públicos se canalicen mediante convocatorias públicas e en concorrencia competitiva para poder apoiar a posta en marcha de:
- Proxectos que promovan a garantía dos dereitos humanos especialmente daquelas persoas máis vulnerabilizadas, mulleres, nenos e nenas, migrantes e refuxiadas, pobos orixinarios, etc nos países empobrecidos.
- Proxectos e iniciativas de Educación para a Cidadanía Global para promover unha cidadanía galega comprometida e mobilizada fronte a loita contra a pobreza, a exclusión, as desigualdades sociais e a degradación do planeta.
3. FONDOS EXTRAORDINARIOS PARA A ACCIÓN HUMANITARIA
Demandamos a posta en marcha dun Comité de Emerxencias, a través da FEGAMP ou do Fondo Galego de Cooperación, para facilitar a dotación de fondos extraordinarios para actuacións de axuda de emerxencia e acción humanitaria coas que facer fronte a catástrofes e desastres que acontezan nos países máis vulnerables.
4. FORTALECER E FOMENTAR A PARTICIPACIÓN ACTIVA DA SOCIEDADE CIVIL
Débese fomentar a participación da sociedade civil nas políticas públicas e promover, dende o público, o seu fortalecemento.
Unha sociedade civil fortalecida implica unha maior resistencia democrática nestes tempos de incerteza e risco de involución social e regresión democrática, e constitúe un antídoto inmellorable contra o discurso do odio, o machismo, a xenofobia, o racismo e as axendas do medo. Neste sentido compre recoñecer que moitos dos grandes temas que hoxe están na axenda política -dereito á saúde, cambio climático, feminismos, desigualdades, pacifismo, consumo responsable, respecto á diversidade, etc.- foron anticipados pola sociedade civil fai décadas, xogando un papel fundamental na súa promoción social.
