A tensión que se vive en Ucraína fai temer unha guerra que, como todas, terá graves consecuencias na vida da poboación civil. Aínda estamos a tempo de frear esta deriva.
Os actores directamente implicados, a Rusia e a OTAN, deben tomar as medidas necesarias para reducir a tensión e garantir o diálogo. A comunidade internacional, incluída o Estado español, debe contribuír a achandar o camiño para a paz.
Os dereitos humanos e a seguridade das persoas deben situarse no centro de calquera proposta que se realice. Tamén debe garantirse a actividade das axencias de Nacións Unidas e as organizacións humanitarias que traballan desde hai tempo coa poboación local.
Como lembra o Movemento pola Paz “toda acción unilateral que se realice á marxe do ámbito institucional e normativo dos Organismos Internacionais supón unha fisura do Dereito Internacional, carece de lexitimidade compartida e conduce, por tanto, a unha escalada do conflito militar”.
O Goberno español, pola súa banda, debe asumir un rol activo na defensa da vía diplomática e a resposta non violenta. Neste momento, é urxente impulsar calquera medida que reduza tensións e garanta a paz na zona.
O contexto no que se desenvolve este conflito é moi complexo. Tal como sinala o Centre Delàs “é dunha enorme complexidade e merece ser analizado con serenidade e responsabilidade tendo en conta todos os aspectos políticos, históricos, económicos, culturais, sociais, entre moitos outros, sen esquecer, evidentemente, o rol que a seguridade enerxética pode xogar no futuro da rexión”.
A complexidade é enorme, pero o risco de que a situación derive nunha guerra debe levar a todas as partes implicadas a contribuír a que a situación non empeore aínda máis.
