Sandra Reyes e Modesto Ochoa, activistas ambientais de Honduras, participaron hoxe nun encontro con diferentes organizacións ecoloxistas que reivindican a protección da zona do río Toxa ante o novo proxecto do Vertedoiro de Campomarzo. As defensoras da terra intercambiaron reivindicacións e experiencias coas activistas locais, quenes lles fixeron un
percorrido e explicación da situación da zona. Puideron compartir, ademáis, o seu relato con moitas outras persoas interesadas na charla-coloquio que se organizou ás 20h no Círculo Recreativo de Lalín.

O Vertedoiro de Campomarzo comezará a operar como un vertedoiro de residuos industriais “non perigosos”. Veciñanza e forzas políticas de Silleda rexeitan este proxecto por considerar o
asentamento do novo vaso de vertidos totalmente inviable ao supoñer un grave perigo para a saúde das persoas e a biodiversidade e para o valor patrimonial da zona

A Plataforma Campomarzo Vertedoiro Non, espazo constituído polos veciños para organizarse,
lidera esta loita contra o que consideran “un atentado ao medioambiente”. O antigo vertedoiro de intertes sobre o que se situará o proxecto atópase ao carón do Río Toxa, no límite da rede Natura, “unha zona especialmente sensible onde conviven especies vulnerables e en perigo de extinción”, apunta o colectivo . Denuncian, tamén, que unha vez se poña en marcha o proxecto, non haberá volta atrás: “os sistemas de depuración serán insuficientes para eliminar os metais pesados que acabarán chegando ás augas”.

A veciñanza ten presentado xa cerca de 400 alegacións ao proxecto, mais aseguran que, a pesar da falla de respostas, seguirán con accións de concienciación ata que teña lugar a resolución da Xunta á solicitude de autorización ambiental por parte da empresa.

Ademais da súa visita a Silleda, Sandra e Modesto pasaron polo Círculo Recreativo de Lalín para
dar a oportunidade ás persoas con interese na temática a achegarse e escoitar o seu relato en favor da protección da terra e dos dereitos humanos.

Estes encontros forman parte das xornadas “A defensa da terra, unha loita global” organizadas pola Coordinadora Galega de ONGDs e financiadas pola Axencia Española de Cooperación Internacional para o Desenvolvemento. A xira de actividas que están realizando Sandra e Modesto enmárcase dentro do proxecto Futuro en Común, unha plataforma que aglutina a forza de entidades da sociedade civil feministas, ecoloxistas, especializadas en cooperación e dereitos da infancia convencidas da necesidade de unir esforzos para cambiar as cousas.