A Directora Xeral de Calidade Ambiental, Sostibilidade e Cambio Climático, Sagrario Pérez Castellanos, e a Subdirectora xeral de Cooperación Exterior, Pilar Romero, recibiron a Sandra Reyes e Modesto Ochoa, activistas ambientais de Honduras, en dúas reunións realizadas esta mañá en Santiago de Compostela. Os encontros englóbanse no marco das xornadas “A defensa da terra, unha loita global” e puxeron o foco en dar a coñecer o traballo que fan Sandra e Modesto na defensa do territorio e en trasladar as propostas das ONGD en canto á debida dilixencia das empresas.

Sandra Reyes e Modesto Ochoa, defensoras da terra e dos dereitos humanos en Honduras, visitan Galicia no marco dunha xira de actividades organizadas pola Coordinadora Galega de ONGD a través do proxecto Futuro en Común, financiado pola Axencia Española de Cooperación Internacional para o Desenvolvemento (AECID). A súa estancia na comunidade estenderase ata o próximo martes 16 de maio e contará con xuntanzas con diversos actores sociais de varias localidades: dende entidades sociais, pasando por centros de ensino, ata conversas coa clase política. Todas elas cun obxectivo común: amosar de primeira man a súa experiencia loitando pola defensa da terra no seu país.

Honduras é un dos países do mundo con maior número de asasinatos de ambientalistas. A
impunidade, a corrupción e a pobreza favorecen que as empresas antepoñan os seus intereses aos
dos propios habitantes do territorio. Por mor do seu labor, Sandra e Modesto, como moitas
persoas defensoras do territorio e dos dereitos humanos en diversos países do mundo, foron
vítimas de ameazas por parte das autoridades estatais e empresas extractivistas.

A obriga de respectar os dereitos

A CGONGD aproveitou a presenza destas dúas experimentadas en materia ambiental para
trasladar ás representantes da Xunta as reivindicacións da Plataforma por Empresas Responsables,
que piden promover normativas que obriguen ás empresas a actuar cumprindo os dereitos
humanos e medioambientais. No marco europeo xa se está a promover unha norma que recolle
estas obrigas, e a nivel estatal existe un borrador de lei que varias organizacións tentan impulsar
para que sexa aprobado antes do fin da lexislatura. Esta normativa implementa plans de debida
dilixencia que contribúan a previr, mitigar e/ou remediar as vulneracións de dereitos. Deste
xeito, as persoas que foran vítimas destas violacións poderán ter acceso á xustiza.