Conmemoramos o Día Mundial das Persoas Refuxiadas de 2023 cando apenas pasou unha semana do naufraxio dun barco fronte as costas gregas con centos de migrantes a bordo. Esta é posiblemente a peor traxedia no Mediterraneo dos últimos anos a pesar de que aínda non se coñece, e probablemente nunca se chegue a saber, o número total de vítimas. Mortes que, segundo denunciou a ONG Open Arms, poderíanse ter evitado xa que se produciron ante a impasiva mirada das autoridades costeiras gregas que, conscientes da deriva do barco dende había 5 días, decidiron non actuar incumprindo a súa obriga de prestar socorro.

Tamén esta semana cúmprese un ano da masacre de Melilla ocorrida o 24 de xuño de 2022 na que faleceron 37 persoas, e outros centos foron vítimas de tortura, tratos crueis, inhumanos e degradantes. A maior parte delas procedían de Sudán, un país inmerso nunha profunda crise política e nun conflito armado que leva anos ensañándose contra a poboación civil.

Pese a solicitude de Nacións Unidas dunha investigación inmediata e completa ao estimar que houbo un uso “excesivo” da forza tanto por parte de Marrocos como de España, a investigación, marcada pola opacidade e as versións contraditorias, finalizou co arquivo da causa en decembro de 2022, exonerando de toda responsabilidade ao Ministerio de Interior, Garda Civil e aos axentes que estiveron sobre o terreo.

A coordinadora Galega de ONGD, xunto con Amnistía Internacional de Compostela, sumámonos ás mobilizacións convocadas ao longo desta semana polo Foro Galego de Inmigración polo I aniversario da #MasacreMelilla e instamos a toda a sociedade civil a participar nas mesmas. Podes velas aquí.

Non hai dúbida de que “é necesario cambiar as actuais políticas de migración e asilo e implementar outras baseadas nos dereitos humanos”. Dende a CONGD subscribimos as demandas realizadas o pasado 8 de xuño por EuroMed Rights e máis de 30 organizacións de toda a rexión euromeditarránea que traballan no ámbito da migración e asilo.