O alcalde de Oleiros, Ángel García, e a concelleira de Participación, Cooperación e Recursos Humanos, Margarita Figueroa, recibiron esta mañá a Sandra Reyes e Modesto Ochoa, defensoras da terra e os dereitos humanos en Honduras, nun encontro protagonizado pola importancia do compromiso local na cooperación ao desenvolvemento.
Oleiros conta cunha das administracións locais galegas máis implicadas coa política de
cooperación. “É unha mostra de que, aínda sendo unha cidade pequena, se pode estar
comprometida coa xustiza social a nivel global e apostar pola cooperación ao desenvolvemento”, apunta Sara García, técnica da Coordinadora Galega de ONGDs. De feito, así o amosa a existencia da Concellería de Participación, Cooperación e Recursos Humanos, presente na xuntanza de hoxe, sendo unha das poucas unidades especializadas que existen nos gobernos locais galegos.
Se ben o traballo activo do Concello de Oleiros é un exemplo de compromiso, o certo é que o
alcance económico de tódolas políticas de cooperación vixentes en España segue a ser insuficiente. “Esperamos que en Oleiros este compromiso siga avanzando en camiño de acadar o acordado hai 50 anos na Asemblea de Nacións Unidas: achegarse progresivamente ao 0,7% dos orzamentos das axudas ao desenvolvemento”, expón Sara García. A día de hoxe, esta porcentaxe segue lonxe das cuantías destinadas a cooperación tanto a nivel local, como autonómico ou estatal.
Traballando dende Oleiros pola educación ambiental
O pasado martes 9 de maio, Sandra e Modesto tamén pasaron a tarde nesta localidade galega.
Visitaron o Centro de Extensión Universitaria e Divulgación Ambiental de Galicia (CEIDA), onde poideron coñecer a historia e o traballo realizado agochados tralos muros do impoñente Castelo de Santa Cruz de Oleiros. Unha vez percorrido o lugar, as activistas protagonizaron un coloquio aberto ao público onde compartiron as súas experiencias e labor en Honduras.
O CEIDA é un organismo que promove a educación ambiental e o intercambio científico e cultural en tódolos sectores sociais. Traballa na procura de solucións aos problemas medioambientais fomentando as boas prácticas cidadás neste eido.
O labor realizado no ámbito da educación ambiental é fundamental para a protección da terra. Así o lembran sempre Sandra e Modesto, recordando que esta “non é unha loita local, senón global” na que tódalas persoas, entidades e administracións debemos sumar.
Estas visitas a Oleiros forman parte das xornadas “A defensa da terra, unha loita global”
organizadas pola Coordinadora Galega de ONGDs e financiadas pola Axencia Española de
Cooperación Internacional para o Desenvolvemento. A xira de actividas enmárcase dentro do
proxecto Futuro en Común, unha plataforma que aglutina a forza de entidades da sociedade civil feministas, ecoloxistas, especializadas en cooperación e dereitos da infancia convencidas da necesidade de unir esforzos para cambiar as cousas.
