Que supón migrar de maneira forzosa? Como se ve o futuro cando o país ao que desexas volver está en guerra? Cal é a vivencia en Galicia dunha persoa migrante ou racializada?…
Dende a Coordinadora Galega de ONGD queremos escoitar -e aprender- das persoas que, moi preto de nós, viven e coñecen en profundidade, de primeira man, estas realidades.
Compostela máis Solidaria: a Compostela que escoita
Coa vontade de escoitar atentamente para garantir os coñecementos necesarios para ser unha cidadanía xusta, crítica e comprometida chega unha nova edición de Compostela máis Solidaria. Un programa de sensibilización que desenvolvemos en colaboración co Concello de Santiago a través da súa Unidade de Atención ás Migracións (UAMI).
En edicións anteriores puxemos o foco nos discursos de odio. Escoitamos o testemuño de varias persoas que nos falaron da súa experiencia fronte a eles. E aprendemos, da man de expertas e organizacións, como combatelos.
Aprendemos moitas cousas, pero unha especialmente importante: a información é a ferramenta máis eficaz contra os bulos e os prexuízos sobre os que se constrúe o odio, pero tamén o medo e a desconfianza.
Por iso cremos que para ser unha Compostela máis solidaria, para asentar ben a sociedade comprometida que queremos ser, temos que escoitar con atención.
Compostela máis Solidaria en tres propostas
Mércores 29 de maio (16:30-18:30), no Edificio Cersia: Compostela co Sur Global
Encontro con ONGD galegas e dos países nos que se desenvolven proxectos que obtiveron a subvención para cooperación ao desenvolvemento do Concello de Santiago.
Participarán Asemblea de Cooperación pola Paz e a súa socia REDES, Solidariedade Internacional e a súa socia en Guatemala Siembra, Arquitectura sen Fronteiras, Fundación Vicente Ferrer, SED e PROYDE.
Será unha moi boa ocasión para coñecer de primeira man os proxectos e os axentes implicados neles! A entrada é libre previa inscrición.
Venres 31 de maio (18:30) no centro sociocultural Santa Marta: “A teteira de Kabul”.
Trátase dunha obra de monicreques para público familiar a partir de 6 anos da compañía Xarope Tulú, en co-produción coa Asemblea de Cooperación pola Paz.
A representación -que contará con servizo de intérprete de lingua de signos– finaliza cun pequeno coloquio e inclúe, como agasallo, un exemplar do conto de Carolina Pujados sobre no que se basea a obra.
A entrada é libre ata completar a capacidade do local. As inscricións xestiónase directamente no centro sociocultural ou a través do noso formulario.
Por último, o venres 07 de xuño, no Museo do pobo Galego, celebraremos un Escoitadoiro: un espazo para o encontro. Nel atoparás conversas abertas e arte para coñecer de primeira man realidades que conviven connosco pero que non sempre escoitamos da man das súas protagonistas.
Falaremos de Palestina coa compostelá e gazatí Sara Ashour e o traumatólogo compostelán Felipe Noya, cooperante de Médicos do Mundo. Ambos estarán acompañados por representantes do movemento universitario SUGxPalestina, que está a ter dende hai semanas unha fonda implicación nsa reivindicacións dos dereitos da poboación civil de Gaza.
O Escoitadoiro servirá tamén para coñecer a labor das defensoras dos dereitos das mulleres, neste caso de República Dominicana. Da man de Syra Taveras, diretora executiva do Centro de Investigación para a Acción Feminina: unha organización feminista e autoorganizada, estreitamente vinculada a outros movementos da sociedade civil para a construción e fortalecemento da democracia e a equidade. E de Juana Ferrer, activista feminista ecoloxista, coñecida pola súa loita no país para o recoñecemento das mulleres rurais e agricultoras. Nominada para o Premio Nobel da Paz pola iniciativa Mil Mulleres para a Paz (2005), Juana Ferrer estará en Galicia participando no programa de acollemento temporal de defensoras de dereitos Galicia Abriga.
Por último, o Escoitadoiro recibirá a Elisabeth Matute e Adys Trujillo, mulleres traballadoras representantes de SINTRAHOCU, o Sindicato de Traballadoras do Fogar e dos Coidados, que abordarán a situación das traballadoras migrantes neste sector. A actual pero tamén a futura, xunto a unha reflexión -que centra a investigación de Zinthia Álvarez Palomino, tamén participante nesta conversa- sobre que resposta se lle dará ás mulleres migrantes que adicaron a súa vida aquí a este traballo cando deixen de estar en condicións de desempeñalo.