No marco dunha serie de encontros cos principais líderes políticos, a presidenta da Coordinadora Galega de ONGD, María Paz Gutiérrez, reuniuse co secretario xeral do PSdeG, Valentín González Formoso, para falar da nova planificación estratéxica da Coordinadora e instar aos socialistas galegos a manter o seu compromiso coa Cooperación ao Desenvolvemento.
Na xuntanza tamén participaron o director da Axencia Española de Cooperación Internacional para o Desenvolvemento, e secretario da Galeguidade do PSdeG, Antón Leis, xunto a secretaria de Relacións co Asociacionismo da Executiva socialista, Mila Castro, e a portavoz de Cooperación do Grupo Parlamentario dos Socialistas, Paloma Castro.
María Paz Gutiérrez trasladoulle aos socialistas galegos o traballo que dende a Coordinadora se está a realizar nesta nova etapa, na que os organizacións consolidan a súa aposta por unha cooperación de vangarda e na que son unha ferramenta fundamental para avanzar na Axenda 2023 no marco global. Neste sentido, María Paz destacou o papel das organizacións “para a denuncia e sensibilización social ante os grandes desafíos que afectan, en maior medida, ás persoas máis vulnerables”. De aí a necesidade dun compromiso político firme coa cooperación ao desenvolvemento e máis no contexto actual, no que se amosa máis necesaria que nunca para defender os dereitos humanos.
Cómpre lembrar as máis de 339 millóns de persoas que, segundo Nacións Unidas, precisarán de axuda urxente en países como Afganistán, Siria, Iemen, Etiopía, República Democrática do Congo, Sáhara ou Somalia. Tamén a necesidade de estar onde non hai emerxencias humanitarias pero si problemas estruturais: emerxencia climática, que afecta e afectará ás persoas máis vulnerables; desprazamentos forzados (superáronse xa os 100 millóns de persoas desprazadas, migrantes e refuxiadas, a cifra máis elevada dende a Segunda Guerra Mundial); e o insoportable incremento da fame e a malnutrición, que creceu por cuarto ano consecutivo e afecta xa a 1 de cada 9 persoas no mundo. A estas problemáticas súmaselle o aumento do autoritarismo e da persecución a activistas e organizacións defensoras de dereitos humanos, así como o aumento dos discursos de odio e o peche de espazos democráticos.
Compromiso coa política social de Cooperación ao Desenvolvemento
Por outra banda, a presidenta da Coordinadora destacou o bo momento da cooperación internacional a nivel estatal, “cunha lei que reforza esta política pública e que podería servir de espello no que mirarse na aposta por avanzar tamén nunha política de cooperación pública galega, comprometida e dotada de máis recursos”.
Neste sentido, salientou a urxencia de incrementar o esforzo en cooperación dende o goberno galego ata acadar o 0’2% do PIB no ano 2026. Co obxectivo de chegar, no 2030, ao 0’7%.
A representante da Coordinadora Galega lembrou que a Cooperación para o Desenvolvemento é unha das políticas públicas que goza de maior consenso, tanto entre a cidadanía como entre os diferentes partidos políticos. Sen esquecer que hai ámbitos nos que hai marxe de mellora e onde “hai necesidade de seguir traballando, sobre todo no contexto municipal e na implicación das entidades locais -concellos das grandes cidades e deputacións- coa cooperación”. Neste sentido, o responsable dos socialistas galegos concordou na necesidade de solicitar unha xuntanza coa nova directiva da Fegamp unha vez que estea constituída, para abordar estas cuestións.
“Hai necesidade de seguir traballando, sobre todo no contexto municipal e na implicación das entidades locais -especialmente os concellos das grandes cidades e as deputacións- no compromiso coa cooperación ao desenvolvemento”
María Paz, presidenta da CGONGD
Para a representante da Coordinadora é tamén importante conectar coa cidadanía “para que comprenda, apoie e lexitime a demanda de investir fondos dende o ámbito local na cooperación internacional”. Gutiérrez explicou que as ONGD galegas conseguiron, co seu traballo, mellorar a vida de 376.365 persoas en 22 países de América Latina, África e Asia. Cun reforzo público por parte das administracións poderían ser máis, tamén nos contextos onde non están postos os focos mediáticos.
Xira de reunións
Este encontro súmase ao mantido hai uns días co Bloque Nacionalista Galego, concretamente coa portavoz nacional Ana Pontón, a viceportavoz Olalla Rodil e o parlamentario Luís Bará.
Dentro desta xira de xuntanzas coas principais forzas políticas galegas está tamén solicitada unha reunión co vicepresidente primeiro e conselleiro de Presidencia da Xunta de Galicia, Diego Calvo, responsable, entre outras áreas, das políticas de cooperación do goberno galego.
