A Coordinadora Galega de ONG para o Desenvolvemento (CGONGD) renovou hoxe a súa Xunta Directiva nunha asemblea celebrada na Biblioteca do Consello da Cultura Galega, en Santiago de Compostela. A politóloga e directora de Solidariedade Internacional María Paz Gutiérrez será a responsable de encabezar a entidade durante o período 2023-2027. O vindeiro cuadrienio suporá unha etapa de renovación marcada pola nova lei estatal de Cooperación para o Desenvolvemento Sostible e a Solidariedade Global –aprobada en febreiro deste ano con case o 90% dos votos a favor- e o V Plan Director da Cooperación Galega 2023-2026, que contou co apoio de todos os axentes.
María Paz Gutiérrez liderará unha nova Xunta Directiva que, por primeira vez contará cun 80% de representación de mulleres na súa estrutura, incluíndo os cargos de presidencia, vicepresidencia e secretaría da organización. Isto supón un paso lóxico e coherente coa realidade do terceiro sector, onde por un lado a maioría das persoas beneficiarias dos proxectos, como por outro as voluntarias e traballadoras son precisamente mulleres como reflicte o Informe sobre o traballo das ONG de Desenvolvemento galegas en 2022 elaborado pola Coordinadora.
A nova presidenta da CGONGD, María Gutiérrez, é licenciada en Ciencias Políticas e da Administración por la USC e máster en Xestión de Entidades Sen Ánimo de Lucro pola Escola de Negocios Caixanova. Dende o ano 2004 é directora de Solidariedade Internacional de Galicia. Tamén é membro do Consello Galego de Cooperación ao Desenvolvemento (CONGACODE) e exerceu o cargo de vicepresidenta da Xunta Directiva da Coordinadora Galega de ONGD entre 2011 e 2017, e de secretaria entre o 2017 e o 2023.
Xunto con Gutiérrez, completan a nova Xunta Directiva Lorena Seijo na vicepresidencia (Agareso-Asociación Galega de Comunicación para o Cambio Social); Gema Filgueira na secretaría (Médicos do Mundo); Ángel Bañobre na Tesourería (Fundación Fabre); e Laura Casal (Amigas da Terra). Luis Barreiro (Fundación Entreculturas), Natalia Monje (Ecos do Sur), Clarisa Giamello (Educo), Lara Medín (Arquitectura Sen Fronteiras) e Irene González (Enxeñería sen Fronteiras) nas vogalías.
Unha nova planificación estratéxica
Así mesmo, a Asemblea Xeral aprobou esta mañá a nova Planificación Estratéxica da Coordinadora para os próximos catro anos, que definirá un proceso co que se quere revitalizar a cooperación ao desenvolvemento tras unha década marcada pola falta de apoio institucional. O feminismo, a ecoloxía, as migracións, a cultura de paz e a defensa dos dereitos humanos serán os eixos que vertebrarán unha nova cooperación transformadora que quere conectar de xeito máis forte coa sociedade, e en concreto, coa xente nova.
A Coordinadora Galega de ONGD suma xa 42 socias
Durante a asemblea aprobáronse así mesmo as contas de 2022 e presentáronse os informes anuais de xestión. Tamén se deu entrada na Coordinadora á ONG Medicus Mundi, con sé en Foz. Medicus Mundi traballa na mellora das condicións sanitarias e fortalecemento da atención primaria da saúde e diminución da pobreza en Mali.
