A Coordinadora Galega de ONGDs renuncia a executar o programa municipal Compostela + Solidaria “por coherencia”

A entidade denuncia que o Concello de Santiago vai camiño de incumprir por cuarto ano consecutivo os seus compromisos coa cooperación ao desenvolvemento e coa loita contra a pobreza, deixando de executar máis de 500.000 euros

Santiago de Compostela, 25 de abril de 2022.- A Coordinadora Galega de ONGDs renuncia a executar o programa municipal Compostela + Solidaria, “por coherencia”, ao constatar que o Concello de Santiago vai camiño de incumprir por cuarto ano consecutivo os seus compromisos coa cooperación ao desenvolvemento e coa loita contra a pobreza, deixando de executar máis de 500.000 euros orzamentados para este labor no que vai de mandato, nun momento especialmente complicado para os colectivos máis vulnerables.

O Compostela + Solidaria é un programa municipal de sensibilización e divulgación que os últimos seis anos desenvolveu a Coordinadora de ONGDs en distintos espazos da cidade, situando Santiago como unha referencia á hora de reflexionar ao redor de temáticas como as migracións, a convivencia entre culturas, a emerxencia climática ou o consumo responsable.

A CGONGD  representa a 45 entidades, que aglutinan a máis de  25.500 persoas entre socias, voluntarias e traballadoras e que operan cada ano en máis de 20 países co obxectivo de mellorar as vidas de máis de 400.000 persoas, a maioría delas mulleres, nenas e nenos. Está integrada na coordinadora estatal e coñece ben o esforzo en cooperación e solidariedade que fan as distintas entidades locais, autonómicas e estatais, na medida das súas posibilidades. É, precisamente, o seu papel dentro das redes de cooperación de Galicia e do conxunto do Estado o que obriga a Coordinadora a renunciar a colaborar no programa municipal Compostela + Solidaria, “por coherencia”, ata que o Concello de Santiago cumpra os compromisos que ten adquiridos na loita contra a pobreza e contra as desigualdades globais.

“Nun contexto como o actual, cando as ONGDs estabamos comezando a atallar as consecuencias sociais da pandemia da COVID-19 e chegou a crise da guerra en Ucraína para agravar a situación de vulnerabilidade que viven millóns de persoas en Europa e en todo o mundo”, salienta Alejandro Quiñoá, presidente da entidade, “precisamos que os nosos representantes respecten o compromiso da cidadanía na loita contra a pobreza e contra as desigualdades globais e cumpran co chamado internacional para reforzar a solidariedade cos países empobrecidos”.

Neste sentido, a CGONGD recorda que o goberno municipal compostelán puxo en marcha en 2017 e en 2018 unha convocatoria de proxectos de cooperación ao desenvolvemento grazas á cal nove entidades galegas traballaron cuestións como a mellora da calidade educativa, a promoción da saúde, a equidade de xénero, o reforzo das capacidades para mellorar a xestión pública da auga ou o fortalecemento de cooperativas de pescadores e pescadoras, man a man con organizacións locais de Honduras, O Salvador, Guatemala, Nicaragua e India.

Nesta carpeta hai dispoñibles para descarga fotografías dos 12 proxectos desenvolvidos dentro desta convocatoria polas ONGDs galegas Agareso, Amigos da Terra, Arquitectura sen Fronteiras, Asemblea de Cooperación pola Paz, Enxeñería sen Fronteiras, Fabre, Manos Unidas, Solidariedade Internacional de Galicia e Vicente Ferrer.

 

Esta convocatoria pública, como outras similares que se veñen desenvolvendo con éxito noutros concellos galegos, funcionou sen maiores problemas na capital galega ata 2019, cando o actual grupo de goberno chegou ao consistorio e deixou sen executar os 120.000 euros previstos para esta partida, alegando “un problema de xestión interna”. Ante as preguntas ao respecto pola Coordinadora, o goberno municipal socialista confirmou a súa vontade de manter os compromisos adquiridos a través da convocatoria de proxectos, que sairía o ano seguinte. Sen embargo, en 2020 quedaron de novo sen executar os 120.000 euros orzamentados para esta convocatoria de proxectos de cooperación, debido a “problemas burocráticos internos” do Concello. En 2021, como medida compensatoria fronte a situación provocada pola COVID e debido á falta de capacidade do goberno municipal de publicar esta convocatoria en anos anteriores, foron orzamentados 220.000 euros, que quedaron novamente sen executar.

Este 2022 é, polo tanto, o cuarto ano que o Concello de Santiago se recoñece incapaz de executar o orzamento comprometido para a solidariedade e a loita contra a pobreza nunha convocatoria que se vén desenvolvendo sen problemas dende hai anos noutros concellos, como o de Lugo, e que tamén desenvolven en termos similares as deputacións de A Coruña e de Pontevedra. “Os tempos convulsos son tempos de aumentar a solidariedade, non de eliminala por falta de capacidade xestora”, recorda o presidente da entidade, Alejandro Quiñoá. “Nestes mesmos catro anos”, sentencia, “a Xunta de Galicia ten aumentado orzamento destinado a cooperación ao desenvolvemento e á loita contra a pobreza n un 40%”.

A esta situación de paralización administrativa, que a CGONGD considera insostible, súmase o feito de que dende a chegada ao goberno do Grupo Socialista non se volveu convocar o Consello Municipal de Cooperación do Concello de Santiago, o espazo de participación cidadá que contaba coa participación activa dos distintos grupos políticos municipais e de axentes de cooperación como as ONGD, representantes das asociacións veciñais, da Dirección Xeral de Relacións Exteriores da Xunta de Galicia, do Consello Económico e Social, do Foro Cívico, do Servizo de Participación e Integración Universitaria da USC, do Fondo Galego de Cooperación e Solidariedade e do Foro Galego de Inmigración.

Por todo isto, a Coordinadora de ONGDs demanda que o goberno municipal faga efectiva a liña de axudas prevista para 2022 e que reactive o Consello Municipal de Cooperación, para o que solicita o apoio dos grupos da oposición e da cidadanía comprometida coa defensa dos dereitos humanos en todo o mundo, “para que traslade esta mesma demanda ao goberno municipal”. “A capital galega ten que estar á altura do que demanda a cidadanía”, remata Alejandro Quiñoá, “no actual contexto internacional, non podemos permitirnos perder, por falta de capacidade de xestión e por cuarto ano consecutivo, o orzamento destinado á loita contra a pobreza e á cooperación ao desenvolvemento”.

Que ofrecemos?

Profesional da cooperación


Se es profesional da cooperación ofrecémosche:

Entidade


Se es unha ONGD ofrecémosche:

Persoa particular


Se es unha persoa individual ofrecémosche: