A Deputación de Pontevedra apoiou entre o 2021 e 0 2022 seis proxectos de cooperación ao desenvolvemento, presentados polas organizacións socias da Coordinadora Galega de ONGD Amigas da Terra, Solidariedade Internacional de Galicia e Taller de Solidariedade, ademais da organización Azada Verde.
Cres que supuxeron un gran coste para a cidadanía? …
No 2022 a Deputación de Pontevedra destinou a cooperación ao desenvolvemento un orzamento de 161.780,44 €.
Unha cantidade que supuxo o 0,09% do orzamento total da institución provincial.
Ou, o que é o mesmo: 0,17€ por cada habitante. Un custe asumible sobre todo se pensas en todo o que se fixo grazas a el!
DEREITO Á ORGANIZACIÓN COMUNITARIA E Á ALIMENTACIÓN DAS MULLERES DE SAN FRANSCICO MORAZÁN
Este proxecto desenvolveuse da man de Solidariedade internacional de Galicia e a súa contraparte PROVIDA (Asociación Salvadoreña de Ayuda Humanitaria) no departamento de Chalatenango, El Salvador, coa participación das comunidades Sumpul Chacones, Sumpum Avelares e Plan del Horno.
Contou co financiamento da Deputación de Pontevedra na súa convocatoria de 2022.
Segundo indica Solidariedade Internacional, contar con este serviu para “fortaleceu a participación comunitaria e o liderado de mulleres. Ademais, mellorouse a súa dieta e autonomía económica coa creación de hortos ecolóxicos”
MELLORA DO EXERCICIO DAS MULLERES RURAIS CUNHA VIDA SAUDABLE, LIBRE DE VIOLENCIAS E EMPODERAMENTO ECONÓMICO
Amigas da Terra desenvolveu dúas fases deste proxecto coa Asociación de Mujeres Defensoras de la Vida (AMDV) e coas comunidades do municipio de El Corpus (Honduras) Guanijiquil, El Caracol, Quebrachal, Baldoquin, Huatales e Corpus Centro (cabecera municipal), na primera fase. Na segunda, coas de Corpus Centro, Guanijiquil, Quebrachal, Baldoquín, Caracol, Huatales Arriba, Huatales Abajo, Tiscagua Abajo, San Judas y Agua Agría.
Ambas fases contaron co apoio da Deputación de Pontevedra, nas convocatorias de 2021 e 2022.
Segundo explican Amigas da Terra, contar con este apoio dende a adminstración local permitiu “a mellora da participación política e social na toma de decisións a nivel municipal e comunitario, no que respecta a políticas e orzamentos locais vinculados á loita contra a violencia de xénero, ademais do reforzo da Red Municipal de Mujeres”. A ONGD galega destaca tamén a “elaboración dun protocolo de actuación para mulleres sobrevivintes de violencia e a mellora da independencia económica das mulleres a través de pequenos emprendementos vinculado á agreoecoloxía”.
FORTALECEMENTO DOS SISTEMAS ALIMENTARIOS LOCAIS SOSTIBLES EN COMUNIDADES RURAIS DE MOZAMBIQUE
A ONGD Azada Verde desenvolveu este proxecto coas comunidades rurais do distrito de Chibabava e Buzi, na provincia de Sofala (Mozambique), da man da organización local Esmabama.
Contaron co apoio da Deputación de Pontevedra na súa convocatoria de 2022. Esta contribución permitiu “acompañar e capacitar a 151 familias agricultoras durante a esteción seca en Mozambique. Isto permitiu mellorar a súa seguridade alimentaria, diversificar a súa dieta e mellorar os seus ingresos”. A capacitación ´que fan referencia materilizouse en “formacións de agricultura sostible, introdución de cultivos (pata e hortalizas) e acompañamento técnico nas súas parcelas familiares”.
