logo

NOVAS

Xan23

O 1% máis rico da poboación mundial acaparou o 82% da riqueza xerada o ano pasado

No marco de Foro Económico Mundial en Davos, que reúne de novo en Suíza ás elites políticas e empresariais, Oxfam Intermón publicou hoxe o informe Premiar o traballo, non a riqueza, no que denuncia que o 82% da riqueza mundial xerada durante o pasado ano foi a parar a mans do 1% máis rico da poboación mundial, mentres que o 50% máis pobre –3.700 millóns de persoas– non se beneficiou o máis mínimo do devandito crecemento.

No Estado español este reparto seguiu a mesma tendencia: o 1% máis rico acaparou o 40% da riqueza creada mentres que o 50% máis pobre apenas conseguiu repartirse un 7%. Premiar o traballo, non a riqueza mostra con detalle como a economía mundial posibilita que os máis ricos sigan acumulando vastas fortunas, mentres que centos de millóns de persoas deben loitar cada día para sobrevivir con salarios de pobreza mínimos alimentando a actual crise de desigualdade global. Así, entre 2006 e 2015, a riqueza desta elite económica creceu nunha media do 13% ao ano; seis veces máis rápido que os salarios das persoas traballadoras que apenas aumentaron de media anual nun 2%. Entre marzo de 2016 e marzo de 2017 produciuse o maior aumento da historia no número de persoas cuxas fortunas superan os mil millóns de dólares, cun novo milmillonario cada dous días.

Dentro das fronteiras do Estado, no último ano, 4 novos multimillonarios españois entraron a formar parte da lista creada pola revista Forbes. Hoxe xa son 25. A tendencia desta concentración da riqueza en poucas mans é similar noutros recunchos do planeta. En América Latina e o Caribe, en 2017 o 10% máis rico da poboación concentraba o 68% da riqueza total, mentres que o 50% máis pobre só accedía ao 3.5%. "O boom dos milmillonarios non é signo dunha economía próspera, senón un síntoma do fracaso do sistema económico. Explótase ás persoas que fabrican as nosas roupas, ensamblan os nosos teléfonos e cultivan os alimentos que consumimos para garantir unha subministración constante de produtos baratos, así como para engrosar os beneficios das grandes empresas e os seus adiñeirados inversionistas”, lamenta o director xeral de Oxfam Intermón, José María Beira.

As mulleres e a mocidade pagan especialmente a factura da desigualdade

Un dos aspectos máis alarmantes do informe é que denuncia que son as mulleres e a mocidade quen máis sofren as consecuencias desta desigualdade. As traballadoras son quen se atopa na base desta pirámide económica: elas gañan menos que os homes e están sobrerrepresentadas nos empregos peor remunerados e máis precarios. A brecha salarial entre homes e mulleres no mundo é do 23%. No Estado, ascende ao 20%. Por contra, 9 de cada 10 milmillonarios no mundo son homes. Pero, ademais, as mulleres son as principais afectadas polos contratos a tempo parcial e temporais.

O mercado de traballo español penaliza con forza á man de obra feminina: o 73,9% da poboación traballadora que recibe os soldos máis baixos son mulleres. Con todo, dentro do grupo das persoas traballadoras con retribucións máis altas, elas só representan o 34,5%. "Falamos con mulleres de todo o mundo cuxas vidas están marcadas pola desigualdade. Como, por exemplo, as mulleres que traballan en fábricas téxtiles vietnamitas, lonxe dos seus fogares e sen ver aos seus fillos durante meses, a cambio de salarios de pobreza. Ou como as que traballan na industria avícola dos Estados Unidos, obrigadas a levar cueiros porque non teñen descansos para ir ao servizo. Terminar coa desigualdade extrema non será posible se non se acaba coa desigualdade de xénero”, sentencia Beira. Así mesmo, o futuro da mocidade, segundo mostra o documento, é totalmente incerto. Ademais de sufrir as consecuencias de empregos precarios, temporais, parciais e mal pagos, non contan cunhas perspectivas a futuro que lles permita ser positivos respecto da súa vida laboral e igualdade de oportunidades. O salario anual obtido por unha persoa moza de 26 anos que accede por primeira vez a un emprego é hoxe un 33% inferior ao gañado en 2008, con maior temporalidade e traballo parcial.

Para máis información>>>

Fonte: Oxfam Intermon



E-BOLETíN

ACTIVIDADES DA SEMANA

BIBLIOTECA

Biblioteca da Coordinadora Biblioteca Documentos on line Documentos

 

FORMAMOS PARTE DE

Solidaria


Fiare


coop57 galicia


pobreza cero


coordinadora


QUIEN DEBEA QUIEN





Coordinadora Galega de ONG para o Deselvolvemento
Rúa dos Basquiños, 33 1º A, Santiago de Compostela | Tlf: 981585189 | sensibilizacion@galiciasolidaria.org

Reconocimiento - CompartirIgual (by-sa)

Os contidos de esta web están baixo unha licenza Creative Commons se non se indica o contrario