logo

NOVAS

Nov20

A Rede Galega de Defensa da Saúde Pública denuncia 300 vulneracións do acceso á atención sanitaria os últimos dous anos

A Rede Galega de Defensa da Saúde Pública, conformada polo Foro Galego de Inmigración, Médicos do Mundo, Amnistía Internacional, Plataforma SOS Sanidade Pública e a Asociación Galega de Medicina Familiar, presentou o 17 de novembro o informe Cinco anos de discriminación sanitaria en Galicia. O informe, realizado por Médicos do Mundo Galicia coa colaboración do Concello de Santiago, recompila 294 vulneracións das que foi testemuña a ONGD en 2016 e 2017. Esta cifra é superior á rexistrada en Catalunya ou case igual á de Madrid, dous territorios con moita máis poboación migrante que Galicia: fronte ás 294 vulneracións rexistradas en Galicia para 89.500 persoas migrantes, Cataluña tivo 132 e Madrid 301 para unha poboación de 1.105.000 e 818.000 migrantes, respectivamente.

Os casos recollidos falan dunha discriminación constante que sofren as persoas migrantes en Galicia á hora de acceder ao sistema de saúde. O informe recompila vulneracións da accesibilidade por falta de información ou información incorrecta, por discriminación, accesibilidade física ou económica. Da mesma forma, moitas persoas acudiron nos últimos anos a Médicos do Mundo por facturacións sistemáticas no servizo de urxencias e por negárselles a atención continuada despois de abandonar o hospital.

A Rede Galega de Defensa da Saúde Pública é contundente: “para poder establecer garantías contra a discriminación nas leis e regulamentos hai que abolir por completo o Real Decreto-lei 16/2012”. Engade que recoñecer que a discriminación nos centros sanitarios é un dos principias obstáculos para o logro dos Obxectivos de Desenvolvemento Sustentable implica traballar de forma coordinada co obxectivo de recoñecer como se dá esta discriminación e poñerlle fin.

Para máis información>>>

Coordinadora Galega de ONG para o Deselvolvemento
Rúa dos Basquiños, 33 1º A, Santiago de Compostela | Tlf: 981585189 | sensibilizacion@galiciasolidaria.org

Reconocimiento - CompartirIgual (by-sa)

Os contidos de esta web están baixo unha licenza Creative Commons se non se indica o contrario