logo

NOVAS

Xun22

Premio da vergoña á Unión Europea

Dende a Coordinadora Galega de ONGD sumámonos ao comunicado da Coordinadora de ONGD de Asturias no que se califica como unha absoluta vergoña a concesión do premio da concordia que a Fundación Princesa de Asturias outorga este ano á Unión Europea, precisamente nun momento no quea súa resposta ante a extrema situación das persoas migrantes e refuxiadas que chegan a territorio europeo afástese cada vez máis dos seus valores fundacionais e atenta contra os dereitos de millóns de persoas.

Os gobernos europeos e a propia UE actúan dun xeito inmoral e ilegal, implementando acordos como o asinado o pasado ano con Turquía que aproba a expulsión das persoas que chegan a Grecia e que vulnera a Carta Internacional de Dereitos Humanos, a Carta de Dereitos Fundamentais da UE, o Convenio Europeo de Dereitos Humanos e a Convención de Xenebra para as Persoas Refuxiadas, así como diferentes Directivas europeas en materia de asilo. O acordo é inmoral, ilegal e a súa aplicación supón un risco para a vida das persoas. Ademais, utiliza ás persoas refuxiadas como moeda de cambio respondendo a intereses económicos e xeoestratéxicos. Facer das persoas refuxiadas unha mercadoría para o intercambio económico é inhumano e intolerable.

A UE segue incumprindo os seus compromisos de reasignación e reasentamento: das 182.000 persoas que debía chegar desde Grecia, Italia e terceiros países, só se acolleu a algo máis do 20%. O prazo para acollelas termina o próximo 26 de setembro e dende a campaña #VindeXa a sociedade civil esixe, neste caso ao goberno español, o seu cumprimento inmediato.
 
O acordo da VergUEnza, xunto coas medidas adoptadas unilateralmente polos estados membros que dificultan ou impiden a entrada no seu territorio das persoas solicitantes de asilo, non achegan unha solución e provocan a apertura doutras vías máis perigosas e custosas para as persoas refuxiadas como a do Mediterráneo Central, a máis mortal do mundo.
 
Igualmente, denunciamos que a UE utiliza a Axuda Oficial para o Desenvolvemento como medio para impoñer políticas de control de fronteiras e como instrumento de chantaxe aos países de orixe.
 
A vergUEnza non merece un premio. Desde a Coordinadora Galega de ONGD esiximos que a Unión Europea estea á altura das circunstancias, recapacite e escoite ás miles de persoas que esiximos, nos mobilizamos, acollemos e asistimos ás persoas refuxiadas. Europa debe deixar de escribir a peor páxina da súa historia recente, dando paso a unha nova etapa na que permitan a todas as persoas ter unha vida digna garantindo os seus dereitos.

Coordinadora Galega de ONG para o Deselvolvemento
Rúa dos Basquiños, 33 1º A, Santiago de Compostela | Tlf: 981585189 | sensibilizacion@galiciasolidaria.org

Reconocimiento - CompartirIgual (by-sa)

Os contidos de esta web están baixo unha licenza Creative Commons se non se indica o contrario