logo

NOVAS

Mai12

O concello de Santiago xunto ás ONGD galegas organizan a segunda edición do Compostela+Solidaria

O concello de Santiago e a Coordinadora Galega de ONGD poñen en marcha a partir do 23 de maio a segunda edición do 'Compostela + Solidaria', un programa de sensibilización con máis de 30 actividades para todas as idades. A través de obradoiros, charlas, exposicións, unha mostra de cine documental, conta contos e unha Feira Solidaria falaremos de Dereitos Humanos e da necesidade de defendelos colectivamente para que todas as persoas, independentemente da súa orixe e de onde vivan, os teñan garantidos. Tamén daremos a coñecer realidade dos países empobrecidos, o traballo das ONGD galegas e as alternativas solidarias e xustas que dende o local contribúen a mudar o mundo.

As actividades desenvolveranse do 23 de maio ao 16 de xuño nos distintos Centros Socioculturais da cidade e todas as propostas son de balde. Neste enlace>>> atoparedes toda a oferta que vos propoñemos.

Esta é o segundo ano que concello de Santiago de Compostela e a Coordinadora Galega de ONGD colaboran no Compostela + Solidaria e esta nova edición trae algunhas novidades. Unha delas é a 'Mostra de cine documental', unha proposta en formato cine foro na que se proxectarán seis títulos de curtas e longametraxes que retratan realidades como as das migracións, o acceso á saúde e o dereito a ter unha vivenda digna. Outra das novidades deste ano é a Feira Solidaria, unha proposta de rúa onde se ofrecerán actividades para todas as idades. Pola mañá será un espazo de intercambio co alumnado dos centros educativos da cidade e, pola tarde, unha feira aberta á cidadanía onde haberá xogos, postos de venta de produtos de comercio xusto e de información das ONGD.  Será o 16 de xuño na Praza Roxa.

Por outra banda, o Compostela + Solidaria deste ano mantén a oferta de actividades de balde para todas as idades nos Centros Socioculturais da cidade e, ademais, incorpora novos espazos como  Biblioteca Ánxel Casal, o Pazo de Fonseca e a Fundación Granell.

Polos Dereitos sen fronteiras
A segunda edición do Compostela + Solidaria ofrece máis de 30 actividades, todas elas enfocadas á promoción e defensa dos Dereitos Humanos. Hoxe, 2.200 millóns de persoas viven en situación de pobreza extrema e as cifras de desigualdade global non teñen precedentes. Estamos a vivir o maior movemento de desprazamentos forzosos dende a II Guerra Mundial e o actual sistema económico está a xerar desequilibrios medioambientais e sociais que desembocaron nunha situación de crise ecolóxica.
 
É neste contexto que as ONGD galegas ofrecerán propostas para reflexionar e debater colectivamente:  obradoiros infantís de cociña para coñecer o comercio xusto; contacontos sobre o valor da diversidade;  obradoiros para aprender a elaborar produtos de limpeza ecolóxicos, para iniciarse no ciberactivismo contra os discursos do oido; charlas sobre xénero e saúde, sobre fiscalidade e evasión fiscal; exposicións sobre as migracións e o dereito ao refuxio, sobre o papel das mulleres na produción de alimentos, etc.  

Serán espazos de convivencia nos que a cidadanía de Compostela poderá coñecer de primeira man a realidade doutras persoas que viven en países empobrecidos e os efectos positivos da cooperación ao desenvolvemento nestes contextos. Todas, actividades para coñecer como contribuír e mudar cuestións globais dende o noso día a día e a nosa realidade máis próxima.

As ONGD que participan no Compostela+Solidaria deste 2017 son AGARESO, Amigos da Terra, Asemblea de Cooperación pola Paz, Educo, Entreculturas, Enxeñería sen Fronteiras, Farmamundi, FISC, Intered, Mans Unidas, Oxfam Intermon, Solidariedade Internacional de Galicia e Terra de Homes.

 


E-BOLETíN

ACTIVIDADES DA SEMANA

BIBLIOTECA

Biblioteca da Coordinadora Biblioteca Documentos on line Documentos

 

FORMAMOS PARTE DE

Solidaria


Fiare


coop57 galicia


pobreza cero


coordinadora


QUIEN DEBEA QUIEN





Coordinadora Galega de ONG para o Deselvolvemento
Rúa dos Basquiños, 33 1º A, Santiago de Compostela | Tlf: 981585189 | sensibilizacion@galiciasolidaria.org

Reconocimiento - CompartirIgual (by-sa)

Os contidos de esta web están baixo unha licenza Creative Commons se non se indica o contrario