logo

NOVAS

Feb14

O apoio da cidadanía ás ONG de Desenvolvemento aumenta

14 de febreiro de 2017. A Coordinadora de ONG para o Desenvolvemento-España presentou hoxe o Informe do Sector das ONGD 2016. O estudo expón os datos máis recentes (2014-2015) de 76 ONGD que integran a Coordinadora (algunhas delas con delegación en Galicia) e das súas 17 Coordinadoras Autonómicas, entre as cales a Galega. A fotografía mostra a imaxe dunha solidariedade cidadá que está por riba dos compromisos políticos coa cooperación. Os fondos privados obtidos en 2015 ascenderon a case 300 millóns de euros, unha cifra que contrasta cos menos de 200 millóns que dedican as administracións públicas. De feito, os fondos públicos caen ata a súa cifra máis baixa nos últimos 10 anos.

Os datos do informe non deixan lugar a dúbidas. A solidariedade cidadá está por diante dos compromisos políticos. Uns datos que, ademais, veñen reforzados polo último Eurobarómetro no que se mostra que o 93% da poboación do Estado apoia a cooperación. A administración pública ten a obrigación de estar á altura da súa cidadanía e aumentar os fondos de acordo aos enormes retos que como humanidade enfrontamos.

O voluntariado, peza clave

O apoio cidadán ao traballo que realizan as ONGD non se limita ás contribucións económicas; de feito, unha das súas grandes fortalezas coas que conta o sector é o labor de voluntariado que realizan máis de 20.000 persoas en todo o Estado. Unha cifra que aumentou un 7% desde 2008; o que demostra que o compromiso cidadán fortaleceuse nun tempo no que os problemas globais se agudizaron.

Un traballo que resiste

O sector sufriu un importante impacto nestes anos de recortes e crise. Entre 2008 e 2013, perdéronse 2.440 empregos nas ONGD do Estado español e aínda que desde entón se recuperaron 1.000 empregos, o sector conta actualmente con 1.500 persoas contratadas menos que en 2008. En conxunto, unhas 8.400 persoas traballan nas ONG de Desenvolvemento, o 60,5% en países nos que traballan as organizacións e 39,5%, no Estado. A pesar da complexidade da situación, desenvólvense máis de 3.600 proxectos en 105 países dos cinco continentes; sobre todo en América Latina e África. As principais áreas de traballo son aquelas relacionadas con xénero e dereitos humanos (aínda que hai outras moitas liñas de actuación como educación, saúde, agricultura...)

Desigualdade de xénero

Outro dos datos destacables que recolle o Informe del sector de las ONGD que compartimos onte fala da desigualdade de xénero nas organizacións. Aínda que a maioría do persoal técnico que traballa nas ONGD son mulleres (70%), os postos de dirección están maioritariamente ocupados por homes (68%). Unha realidade que reflicte a desigualdade que se dá de forma xeralizada no terceiro sector (máis información>>>).

Recomendacións

Para o presidente da Coordinadora estatal de ONGD, Andrés Amayuelas, “facer fronte a unha realidade mundial na que afrontamos múltiples e complexas crises, esixe políticas que garantan os dereitos das persoas e do planeta. Neste sentido, a cooperación é parte esencial da solución e, por tanto, debe ser fortalecida”.

“O Estado debe ser capaz de estar á altura da solidariedade da súa cidadanía. Se pretende ser un actor internacional relevante que contribúa a remover as estruturas económicas, sociais e políticas que perpetúan a pobreza, a desigualdade e a inxustiza dentro e fóra das nosas fronteiras, debería apostarse con valentía pola política de cooperación.”

Neste enlace>>> podedes acceder á web con toda a información.

E-BOLETíN

ACTIVIDADES DA SEMANA

BIBLIOTECA

Biblioteca da Coordinadora Biblioteca Documentos on line Documentos

 

FORMAMOS PARTE DE

Solidaria


Fiare


coop57 galicia


pobreza cero


coordinadora


QUIEN DEBEA QUIEN





Coordinadora Galega de ONG para o Deselvolvemento
Rúa dos Basquiños, 33 1º A, Santiago de Compostela | Tlf: 981585189 | sensibilizacion@galiciasolidaria.org

Reconocimiento - CompartirIgual (by-sa)

Os contidos de esta web están baixo unha licenza Creative Commons se non se indica o contrario